Berg jou hele lewe op jou knipmes
2012-01-18 06:00
- Artikelopsies
- Deel
- Kry Die Burger op
Een van die eienskappe wat ’n goeie katoeter moet hê, is veelsydigheid sonder om elegansie in te boet.
So byvoorbeeld was die klassieke Switserse leërmes ’n begeerlike ding: eenvoudig dog veelsydig. Maar oordryf dit met te veel goeters wat kan uitvou, uitwip of uitrol en die hele ding raak ’n grap.
Daarom hou ek so baie van Victorinox se nuutste weergawe van dié einste leërmes: ’n lem, ’n skêrtjie, ’n naelvyl en ’n minuskule soliedestaat-hardeskyf wat tot ’n terragreep se geheue kan berg!
Soliedestaat-skywe (SSD) is besig om die nuwe standaard te word omdat hulle vinniger, stiller en betroubaarder as die ou hardeskywe is. Victorinox sê sy mes-weergawe hiervan is die kleinste SSD wat só baie data kan berg. Dit bied outomatiese rugsteun van jou data elke keer as jy dit by jou rekenaar inprop en het selfs ’n klein loodkristal-skermpie wat jou vertel wat aangaan.
’n Terragreep is genoeg om al die data te berg wat die meeste mense in ’n leeftyd kan versamel, selfs al bêre jy al die korrespondensie oor jou rekeningdispuut met die Johannesburgse metroraad in hoëresolusie-fotoformaat daarop. En dit pas gemaklik in jou sak.
Victorinox het terselfdertyd messe met meer beskeie maar steeds baie nuttige USB 3.0-geheuestokkies bekend gestel met kapasiteit wat wissel van 64 tot 512 gigagrepe.
Die pryse is heelwat
hoër as wat die Nigeriër by die verkeerslig jou gaan vra, maar dan is sy modelle waarskynlik nie water- en skokbestand en beveilig teen kuber-mesdiewe nie.
Victorinox het onder meer ’n lekker 007-oplossing vir minstens ’n deel van laasgenoemde probleem: die skywe vernietig hulself as hulle agterkom iemand probeer onregmatig toegang kry. As ’n kuber-inbreker byvoorbeeld veelvoudige wagwoorde probeer, of sagteware gebruik wat die ander veiligheidsmaatreëls probeer omseil, sal jou mes ’n oormaat stroom na die skyfie stuur en dit sodoende permanent onbruikbaar maak.
Baie oulik, maar net as jy in die soort bedryf is waar jy liewer jou inligting sal verloor as dat dit in die verkeerde hande beland, soos spioenasie of krieket-administrasie.
Pryse wissel tussen $3?000 (ja, reg gelees: meer as R24?000) vir die terragreep-weergawe en sowat $650 (sowat R5 225) vir die brood-en-tsjakalaka-weergawe. Al die modelle is beskikbaar in die tradisionele rooi, maar jy kan ook ’n swart weergawe kies wat geen lemme of ander bykomstighede het nie sodat jy dit op die vliegtuig kan saamvat.
’n Mes sonder lemme, dus: iets waarmee seker net Switsers vorendag sou kon kom.