‘Malema se woorde gevaarlik, hoor hof
2009-11-25 02:11
- Artikelopsies
- Deel
- Kry Die Burger op
Daniëlla du Plooy
Johannesburg
As politikus moet mnr. Julius Malema, leier van die ANC-jeugliga, sy woorde weeg en besef watter invloed dit kan hê.
Só het mnr. Chris Todd, prokureur van die Sonke Gender Justice Network (SGJN), gister in die gelykheidshof in Johannesburg gesê.
Mnr. Mbuyiselo Botha, SGJN-raadgewer, het Malema vroeër voor dié hof gedaag vir haatspraak en teistering nadat hy geweier het om verskoning te vra vir sy opmerkings voor studente van die Kaapse Skiereiland Universiteit van Tegnologie.
Albei regspanne het gister hul slotbetoë gelewer. Malema was nie teenwoordig nie.
Malema het hom in Januarie uitgelaat oor die verkragtingsaanklag waarop pres. Jacob Zuma in 2006 onskuldig bevind is.
Malema het gesê Khwezi (die klaagster se skuilnaam) het ’n “lekker tyd” gehad. “As ’n vrou dit (seks) nie geniet nie, loop sy vroeg in die oggend. Dié wat dit geniet, wag totdat die son opkom en vra ontbyt en taxigeld. Dié oggend het daardie vrou ontbyt en taxigeld gevra. Jy vra nie taxigeld van iemand wat jou verkrag het nie.”
Hy het vroeër in die hof ontken hy het dié uitlatings oor vroue in die algemeen gemaak. “Ek het spesifiek van haar (die klaer) en dié saak gepraat.”
Todd het gesê: “Geslagsdiskriminasie is nie so sigbaar soos rassisme nie, maar is ewe ernstig.
“Sy woorde is nog gevaarliker omdat hy dit by ’n openbare politieke byeenkoms gesê het... jong mense, wat hom as rolmodel sien, het na hom kom luister”
Mnr. Tumi Mokwena, Malema se prokureur, het gesê Malema se woorde is uit verband geruk.
“Net dié enkele sinne is aangehaal. As na die hele konteks gekyk is – Malema is gevra om kommentaar te lewer op Zuma se verkragtingsaak – sou hulle verstaan het wat hy bedoel.”
Uitspraak is voorbehou.