Ma wil selfmoord ‘agter die rug kry’

Jan Gerber

Stellenbosch

“Dis hartseer, maar ons cope.”

Dít was basies al wat Bernadine, ma van me. Angelique Cilliers (25), gister – ’n week ná haar dogter se selfmoord – aan Die Burger wou sê ná mediaberigte die afgelope naweek waarin sy haar dogter se tragiese verhaal vertel het.

Cilliers is op 19 Januarie in me. Elfriede Weich se woonstel in Kusweg, Strand, in hegtenis geneem. Weich se liggaam is in ’n tas onder haar bed aangetref. Sy is vermoedelik verwurg.

Verlede Maandag het Cilliers haarself met ’n serp in die Polls­moor-tronk se hospitaalvleuel opgehang. Sy sou Vrydag in die Strand-landdroshof om borgtog aansoek doen. Die moordsaak teen haar is van die rol geskrap.

Luidens mediaberigte het Cilliers se droom om ’n sangeres of model te word, ontspoor toe sy as 16-jarige in Bellville bedwelm en verkrag is.

Die drie mans wat hiervoor verantwoordelik is, is nooit vasgetrek nie, en Cilliers het in dwelmmisbruik verval.

Sy het nie hoërskool voltooi nie en haar babadogter, wat gebore is toe sy as 19-jarige by ’n rehabilitasiekliniek was, is aangeneem.

Die Burger het verlede week berig sy is twee keer in Noupoort opgeneem. Die tweede keer is sy weg nadat die sentrum ’n klag van poging tot moord teen haar aanhangig gemaak het. Sy het glo ’n mede-pasiënt teen haar keel gesny en met ’n mes gedreig.

Niks het van dié saak gekom nie, het mnr. Sopho Nissiotis, direkteur van die Noupoort-rehabilitasiesentrum, gesê.

Haar betrokkenheid by die dood van mnr. Winston Ferreira (49) is ook ondersoek. Ferreira se lyk is op 16 Januarie in sy woning in Table View gevind. Geen ooglopende oorsaak van dood was sigbaar nie.

Gister het Bernadine, wat nie haar van wil noem nie, ooglopend uitgeput voorgekom.

Sy wou nie verder oor die aangeleentheid praat nie en wil dit agter die rug kry.

Daar is nog nie begrafnisreëlings nie.

Intussen gaan die ondersoek na Cilliers se dood voort, het insp. Rodney Franks gister gesê.

- Die Burger