Dirk Prinsloo dalk aan SA uitgelewer ná sy verhoor vir bankrooftog in Januarie in Belo-Rusland

Virginia Keppler

Johannesburg

Die vermeende kinderseksmisdadiger Dirk Prinsloo se verhoor weens ’n mislukte bankrooftog in Belo-Rusland sal waarskynlik teen einde Januarie begin.

Volgens die koerant Sondaghet Prinsloo se Belo-Russiese vriendin, Tatiana, gesê die saak sal volgens die ondersoekbeampte op 10 Desember afgesluit word.

Nadat die polisie-ondersoek klaar is, sal ’n staatsaanklaer die dossier deurgaan.

Dit sal glo tussen vyf en tien dae neem.

Daarna sal dit aan ’n regter gestuur word wat sowat ’n maand tyd het om dit deur te gaan, lui die berig.

Sr.supt. Tummi Golding, woordvoerder van Interpol in Suid-Afrika, het gister by navraag gesê sodra die regsproses in Belo-Rusland afgehandel is, sal die twee lande saam besluit oor wanneer Prinsloo aan Suid-Afrika uitgelewer gaan word.

“Tot dan kan ons geen datum van uitlewering bekend maak nie,” sê Golding.

Volgens Sondag is Prinsloo vir sielkundige waarneming na ’n inrigting gestuur waar vasgestel is hy is nie geestesversteurd nie.

Prinsloo is in Junie in Minsk, hoofstad van Belo-Rusland, in hegtenis geneem.

Hy was hy glo daar in ’n mislukte bankrooftog betrokke.

Prinsloo het glo ’n bank probeer beroof in die klein dorpie waar hy saam met Tatiana en hul eenjarige dogtertjie gewoon het.

Prinsloo word glo ook in Minsk met ’n prostitusienetwerk verbind.

Die gewese advokaat het in 2005 tydens ’n “sakebesoek” aan Rusland verdwyn terwyl hy in Suid-Afrika op borgtog was.

Hy het saam met Cézanne Visser, sy eertydse vriendin, in die hooggeregshof in Pretoria tereggestaan op verskeie aanklagte wat onder meer met seksuele dade met kinders en pornografie verband hou.

Visser, oftewel “adv. Barbie”, is op 11 Oktober skuldig bevind op 11 aanklagte van bedrog, onsedelike aanranding, uitlokking van ’n minderjarige tot onsedelike dade, die besit van kinderpornografie en die vervaardiging van kinderpornografie.

Haar vonnisverrigtinge begin op 8 Desember.

- Die Burger