Verkeer ontwrig toe luukse passasiersbus brand
2009-11-23 01:43
- Artikelopsies
- Deel
- Kry Die Burger op
Tisha Steyn
George
’n Luukse passasiersbus het Saterdagoggend omstreeks 10:30 op die N2 tussen Mosselbaai en George uitgebrand.
Daar was geen passasiers aan boord van die 62-sitplekbus wat aan Brandt Vervoer behoort nie.
Die bestuurder is ongedeerd.
Volgens Brandt Vervoer was die bus op pad George om buitelandse besoekers op te laai en na Oudtshoorn te neem. ’n Ander busdiens is gevra om die buitelandse besoekers te vervoer.
Volgens ’n ooggetuie, mnr. Steve D’Elboux, ’n fotograaf wat op die toneel aangekom het kort nadat die bus aan die brand geslaan het, het die bestuurder afgetrek nadat hy rook by die agterwiele gewaar het.
“Die polisie was binne oomblikke daar. Hulle het die N2 afgesper. Mosselbaai, George en Eden se brand en reddingsdienste asook die Rooi Kruis se AMS-helikopter was kort daarna op die toneel,” het hy gesê.
Die brand het na bewering in die enjin-kompartement ontstaan en ’n sterk suidoostewind het die vlamme vinnig na die res van die bus versprei.
Verkeer is herlei na die R102 na George. “ ’n Paar motoriste was baie ongelukkig omdat hulle op pad was na die George-lughawe en sou moontlik hul vlugte verpas,” het D’Elboux gesê.
Die brand was omstreeks 12:00 onder beheer.
Die uitgebrande bus is kort daarna na George geneem en die pad is weer vir verkeer oopgestel.
Brandt Vervoer doen landswye toere, asook toere na Namibië.