Resessie knou Wes-Kaapse regering se inkomste uit dobbelary, sê minister

Philda Essop

Kaapstad

Die resessie knyp ook in die dobbelbedryf.

Dít blyk duidelik uit die laer inkomste wat die Wes-Kaapse regering die afgelope boekjaar uit dobbelary gekry het.

Mnr. Alan Winde, provinsiale minister van finansies en ekonomiese ontwikkeling, het gister syfers hieroor in sy aansuiweringsbegroting bekend gemaak.

“Casino-belasting het in die boekjaar 2009-’10 gedaal weens die swakker ekonomiese klimaat. Die provinsie het potensiële inkomste van tot R40 miljoen per jaar op middeltermyn verloor.”

Daar is altesaam vyf casino’s in die Wes-Kaap.

Winde het voor sy toespraak op ’n nuuskonferensie gesê as die ekonomie probleme het, styg drankverkope en dobbelary gewoonlik. “Die syfers toon egter dat mense nie geld het om te dobbel nie.”

Volgens hom is die belasting wat casino’s moet betaal vanjaar verhoog.

Luidens die Wes-Kaapse Sestiende Wysigingswetsontwerp op Dobbelary en Wedrenne gaan die koste van die jaarlikse casino-bedryfslisensies van R120 000 tot R172 000 styg. Die jaarlikse verhoging vir ’n beperkte dobbelmasjienlisensie styg van R60 000 tot R86 340, terwyl die totalisator-bedryfslisensies van R2 400 tot R3 450 styg.

Ander inkomstebronne van die provinsie sluit motorvoertuiglisensies en hospitaaltariewe in.

- Die Burger