Trevor Manuel se reise kos byna R2 miljoen in een boekjaar

Liesl Peyper

Kaapstad. – Die reiskoste van mnr. Trevor Manuel, minister in die presidensie gemoeid met beplanning, het die afgelope boekjaar byna R2 miljoen beloop.

Dit het aan die lig gekom in ’n antwoord op ’n parlementêre vraag van die DA.

Uit die antwoord wat deur die tesourie verskaf is, blyk dit voorts dat altesaam R5,4 miljoen in die boekjaar 2008-’09 aan die reiskoste van Manuel (toe nog minister van finansies), mnr. Lesetja Kganyago, direkteur-generaal van die tesourie, en die 10 adjunkdirekteurs-generaal van dié departement bestee is.

Me. Lindani Mbunyuza, ’n woordvoerder van die tesourie, het by navraag aan Die Burger gesê daar is geen perk op hoeveel geld die minister van finansies, die adjunkminister en die ander top-amptenare aan amptelike reise mag bestee nie.

Boonop is ministers, ingevolge die reëls van die ministeriële handboek, daarop geregtig om besigheidsklas te vlieg op binnelandse vlugte en eersteklas buitelands.

Volgens Mbunyuza is besigheidsklasvlugte nie die DG en sy adjunkte beskore nie. Op binnelandse vlugte moet hulle ekonomiese klas reis. Hulle mag wel op buitelandse vlugte van langer as sewe uur besigheidsklas vlieg. ­

- Die Burger