Getuienis ‘hou nie gevaar vir staat in’

Marga Ley

Johannesburg

Daar is hoegenaamd geen gevaar vir die staat nie indien die oud-intelligensiehoof getuienis sou lewer oor die bestaan van ’n hoogs geheime dokument wat na bewering deur mnr. Jackie Selebi aan sy vriend mnr. Glenn Agliotti gewys is.

Regter Meyer Joffe het gister die aansoek van die minister en direkteur-generaal (DG) van staatsveiligheid om te keer dat mnr. Barry Gilder getuig, van die hand gewys.

Gilder is die voormalige ­koördineerder van die nasionale intelligensie-koördineringskomitee (Nicoc).

Joffe het bevind vrae oor die bestaan van die dokument en oor een paragraaf daarin waarvan die inhoud reeds bekend is, stel nie die staat se inligtingsprosesse, metodes en bronne in gevaar nie, soos aangevoer deur adv. Marumo Moerane SC, vir die minister en DG.

Joffe het gesê hy sal die getuienis met geslote deure aanhoor om sodoende bykomende versekering aan die minister en DG te bied dat niemand sal hoor wat in die dokument staan nie.

Dié hoogs geheime dokument – waarvan die inhoud nou volgens die departement van staatsveiligheid selfs vir die regter en die hof té geheim is – is volgens Agliotti deur Selebi aan hom gewys.

Selebi het aan Agliotti vertel die paragraaf waarin beweer is dat hy geld van die Kebbles ontvang, is uit Nicoc se finale dokument gehaal en dat hy (Selebi) aangedring het op ’n skriftelike verskoning.

Die brief met die verskoning is na bewering deur Gilder ­geskryf.

Adv. Gerrie Nel, vir die staat, wil hê Gilder moet bevestig dat die dokument bestaan het en dat hy die verskoningsbrief aan Selebi geskryf het.

Net nadat die media en almal in die hof se openbare galery gevra is om die hof te verlaat sodat Gilder kon getuig, het Moerane uitstel gevra sodat hy met die minister en DG kan praat oor ’n moontlike appèl teen Joffe se bevinding.

Agliotti, ’n veroordeelde dwelmbaas wat ook gaan teregstaan van die moord op die mynmagnaat mnr. Brett Kebble, het vroeër getuig Selebi het die dokument aan hom ­gewys. Hy het getuig oor ’n paragraaf waarin inligting was dat die sakeman mnr. Jurgen Kögl beweer het dat geld van die Kebbles na Selebi vloei.

Die saak is tot Dinsdagoggend uitgestel.

Joffe het dit reeds telkens in die hof duidelik gemaak dat hy voel die saak vorder nie vinnig genoeg nie en dat daar te veel om uitstel gevra word.

Die staat het reeds aangedui dat Gilder sy laaste getuie op sy aanvanklike lys van 65 getuies is.

- Die Burger