Man kry R5 m. vir afval-storting

Tom de Wet

Welkom

Mnr. Gavin Brasher, ’n sakeman van Welkom op wie se perseel die grootste stortingsterrein vir gevaarlike mediese afval tot nog toe in Suid-Afrika Vrydag gekry is, het dit teen betaling gedoen omdat hy geldelik in die knyp is.

Brasher het gister by monde van sy prokureur, mnr. Hannes Peyper, erken dat hy R5 miljoen by die opposisie van Wasteman, wat die kontrak vir die hantering en verbranding van mediese afval met 150 hospitale in Suid-Afrika het, sou kry om die afval by sy onderneming, Maximus Bricks, te stort en te begrawe.

Brasher, met verskeie ondernemings in die Goudveld, het onlangs R10 miljoen verloor in ’n kontrak wat hy met die bankrot Pamodzi-myn gehad het. Hy het ook ’n kontrak vir die vervoer van mediese afval met Wasteman. Dié kontrak behels die vervoer van die afval van hospitale in Durban na Wasteman se verbrandingsoond in Klerksdorp.

Peyper het gesê Brasher is deur ’n opposisiemaatskappy van Wasteman genader om teen betaling ’n lokval vir Wasteman te stel. Van die sakke gevaarlike mediese afval is by die steenmakery afgelaai en begrawe as die vragmotors op pad na Klerksdorp daar oornag het, waarna dieselfde hoeveelheid sakke met “ander goed” volgemaak en saam met die res van die mediese afval na die verbrandingsoond in Klerksdorp vervoer is. Sowat twee weke gelede is daar op versoek van die ander maatskappy ook vragte mediese afval by die stortingsterrein van ’n myn in Welkom, sowel as by die ou skougronde in die stad, begrawe “om die prentjie meer volledig te maak”.

Peyper het gesê die Groen Skerpioene weet nie van dié vragte nie, maar hy sal dit aan hulle gaan uitwys as hulle daarna vra.

Brasher was glo bewus daarvan dat beeldmateriaal van die onwettige storting gemaak is.

Die opposisiemaatskappy sou benewens die betaling van R5 miljoen aan hom ook later die stortingsterrein by Maximus Bricks kom skoonmaak én sy boete betaal as hy skuldig bevind word.

“Hy het weens groot geldelike druk toegelaat dat die verkeerde ding gedoen word en die mediese afval op sy terrein laat begrawe. Hy het Wasteman betrek.”

Toe Brasher Vrydag tydens die polisie-optrede die opposisiemaatskappy wou kontak, is sy oproepe nie beantwoord nie.

Daar is vasgestel die mediese afval, hoofsaaklik vanaf Durban, is die afgelope paar maande een keer per week by Maximus Bricks in Welkom afgelaai. Die werkers van die steenwerke het geen beskermende klere gedra nie en is glo elk R50 ekstra betaal om die mediese afval af te laai.

Me. Joanne Yawitch, adjunk-direkteur-generaal van die departement van omgewingsake, het gesê Wasteman en sy maatskappye word ondersoek.

Die maksimum straf vir die oortreding is ’n boete van R10 miljoen of 10 jaar tronkstraf.

Die voorval het vrae laat ontstaan oor die besoedeling van ondergrondse water en siektes soos hepatitis, MIV, ingewandskoors, cholera en geelkoors.

- Die Burger