Soldate se bonusse bly in die slag

Erika Gibson

Johannesburg

Die departement van verdediging praat met ’n gevurkte tong en belowe een ding in die openbaar, net om die volgende oomblik die teenoorgestelde toe te pas.

Daarmee het die departement enige vertroue wat daar nog in die stelsel bestaan het onder soldate uitgewis, het ontstoke soldate en ’n militêre vakbond gesê.

Hulle het gereageer op die nuus dat die weermag ondanks die onlangse bevinding dat hy weens die haglike omstandighede en vergoeding van soldate op ’n “tydbom” sit, pas besluit het om vanjaar nie merietebonusse uit te betaal nie.

Al die soldate is pas deur die evalueringsproses waartydens hul prestasies die afgelope jaar beoordeel is om te bepaal of hulle wel vir so ’n bonus kwalifiseer.

“Daar is dus ’n redelike verwagting onder die presteerders geskep dat hulle wel beloon sal word, net om nou uit te vind dat daar sonder enige rede geen uitbetalings sal wees nie,” het adv. Pikkie Greeff van die SA Nasionale Weermag­unie (Sanwu) gesê.

Soldate het gesê die laaste bietjie aansporing om in die weermag te bly, het nou verdwyn.

Hulle glo eenvoudig nie dat die ministerie en die topbestuur soldate se belange op die hart dra nie.

Hulle wil boonop weet hoekom die bonusse net van vlak 1 tot 12 opgeskort is. “Die generaals is bo vlak 12. Beteken dit hulle gaan steeds bonusse kry wat in verhouding met hul salarisse aansienlik meer is as vir jong soldate?”

Die militêre dienskommissie wat onlangs deur me. Lindiwe Sisulu, minister van verdediging en militêre veterane, aangewys is om soldate se probleme te ondersoek, het die afgelope week weens die erns van die saak ’n tussentydse verslag uitgereik.

Dit was omdat die kommissie meen die weermag sit op ’n “tydbom” weens soldate se haglike werksomstandighede, bouvallige verblyf en karige salarisse.

Die departement het erken die weermag het ’n “dekade van verwaarlosing” agter die rug.

“Dieselfde departement moet nou verduidelik waar die miljoene rande heen is wat vir die merietebonusse begroot is,” het ’n woedende groep soldate aan Die Burger gesê.

“As dit nie gebruik word nie, kan daar nie in die volgende jaar se begroting weer daarvoor begroot word nie. Die afleiding is dus dat dit vir iets anders gebruik is en ons wil weet waarvoor!”

Luidens ’n interne bulletin het die verdedigingsbevelsraad besluit om die bonusse op te skort.

Die waarnemende sekretaris van verdediging, mnr. Tsepe Motumi, het die besluit bekragtig.

“Die beleid bepaal dat die sekretaris sy diskresie in dié verband rasioneel moet toepas. Daarom het elke benadeelde die reg om te weet waarom die besluit geneem is,” het Greeff gesê.

“Hierdie besluit is ’n klap in die gesig van duisende toegewyde en hardwerkende soldate.”

Soldate het gemor dat die reuseverhogings wat generaals aan die begin van die jaar gekry het, dalk die bonusgeld verorber het.

- Die Burger