Amptenaar onder skoot ná woordestryd tussen ministers

Philda Essop

Kaapstad. – ’n Amptenaar word deur “administratiewe prosesse” in die gesig gestaar nadat hy glo ’n ongemagtigde verklaring namens dr. Lindiwe Sisulu, minister van verdediging en militêre veterane, uitgereik het.

Dié verklaring – wat intussen teruggetrek is – was sentraal tot ’n woordestryd wat verlede week tussen Sisulu en mnr. Tokyo Sexwale, minister van huisvesting, ontstaan het.

Dié twee ministers, wat verlede week deur die ANC uitgetrap is, het die naweek in ’n gesamentlike verklaring gesê hulle respekteer mekaar.

Albei is “verras en uit die veld geslaan” deur “totale wanvoorstellings” oor die stand van hul werksverhouding.

Inligting uit ’n parlementêre vraag het verlede week daarop gedui dat die huisvestingdepartement onder Sisulu se leierskap meer as R2  miljoen bestee het aan ’n teaterstuk om die staatsbehuisingsprogram te bemark.

Sexwale het glo in ’n onderhoud op Radio 702 gesê hy “het nie tyd vir opvoerings en tea­ter wat niks met die bou van huise uit te waai het nie”.

Die Cape Times het berig ­Sisulu het Sexwale aangeval, wat “sedert die begin van sy ampstermyn nog nie ’n enkele nuwe program van stapel gestuur het nie”.

Mnr. Siphiwe Dlamini, kommunikasiehoof van die departement van verdediging en militêre veterane, het gesê administratiewe prosesse is teen ’n staatsamptenaar begin wat ’n ongemagtigde verklaring oor die ministerie van huisvesting uitgereik het.

“Terwyl ons verstaan dat die voorneme van die betrokke staatsamptenaar was om dit wat hy as wanvoorstellings en wanpersepsies beskou het reg te stel, was die toon van die taal egter jammer,” het hy gesê.

- Die Burger