Tydskrif sal moet opdok oor hy foto wys
2009-11-10 01:54
- Artikelopsies
- Deel
- Kry Die Burger op
ROZANNE ELS
ROZANNE ELS
Kaapstad
Die Wes-Kaapse hooggeregshof het ’n bekende branderry-tydskrif voor stok gekry ná die publikasie van ’n “uitlokkende” foto van ’n 12-jarige meisie wat volgens dié meisie se ma haar onskuld weggeraap het.
Regter Dennis Davis het gister in me. Angela Wells se guns bevind nadat sy ’n eis teen die tydskrif Zigzag se eienaar, Atoll Media (Edms.) Bpk., en redakteur, Will Bendix, ingestel het.
Davis het bevind dat die foto van Wells se minderjarige dogter, Taryn, as ’n “prikkelpop”-plakkaat bedoel was.
Volgens hom is die foto sonder toestemming gepubliseer, of sonder agting van die moontlike implikasies.
Die publikasie daarvan was nalatig en nie geregverdig nie, het hy bevind.
Die foto is in April 2006 gepubliseer met die woorde “pure filth” daarby.
Benewens publikasie in Zigzag, wat tussen 30?000 en 40?000 lesers het, het dié foto op die SuperSport-kanaal verskyn.
Dit wys Taryn in haar bikini op die strand in Kaap St. Francis en is van agter deur ’n vryskut-fotograaf sonder haar medewete geneem.
Haar gesig is nie identifiseerbaar nie.
Taryn het vroeër getuig hoewel sy aanvanklik opgewonde was om in die tydskrif te verskyn, is sy later onder meer ’n “slet” en “Port Elizabeth se klein porno-ster” genoem.
Bendix het in vroeëre getuienis erken dat hy nie die foto sou gepubliseer het as hy geweet het Taryn is 12 nie, maar volgehou “pure filth” is “positiewe branderryer-slang” wat op “goeie gehalte” dui.
Taryn het op haar beurt getuig dié woorde het haar vernietig.
Davis het bevind dat enige leser met ’n normale intellek die woorde as negatief sou interpreteer en is die sogenaamde positiewe betekenis van die woorde nie bewys nie.
Gevolglik het die tydskrif hom aan laster skuldig gemaak.
“Om ’n slet en ’n porno-ster genoem te word, is ’n vernederende en verlagende ervaring vir enigiemand, maar selfs meer so vir ’n jong mens,” het Davis gesê.
Wells het Atoll Media en Bendix vir R500?000 gedagvaar nadat hulle geweier het om om verskoning te vra.
Davis het dié bedrag as buitensporig bestempel, veral omdat die geskil waarskynlik nie in die hof sou gedraai het as ’n verskoning voorhande was nie.
Davis het gelas dat R10?000 aan Wells betaal word.
Volgens mnr. Johan Theron, wat deel van die verweerders se regspan was, het Davis se uitspraak verreikende gevolge vir die media, veral ten opsigte van die publisering van foto’s van individue sonder hul toestemming.
- Die Burger