Radebe systap vrae oor sy departement se reis- en verblyfuitgawes
2009-11-23 01:43
- Artikelopsies
- Deel
- Kry Die Burger op
Heindrich Wyngaardt
Kaapstad
Mnr. Jeff Radebe, minister van justisie en grondwetlike ontwikkeling, weier om te verklap presies hoeveel geld vanjaar onderskeidelik deur hom, sy adjunk en senior amptenare van sy departement op hotelverblyf, restaurantuitgawes en reiskoste bestee is.
Dit is waarskynlik om hom te red van die openbare verleentheid wat hierdie soort inligting die afgelope tyd vir van sy kabinetskollegas veroorsaak het as deel van die DA se veldtog om “vermorste uitgawes” deur die regering oop te vlek.
Onkoste vir “personeel in die kantoor van die minister” het tussen April en Oktober vanjaar meer as R1,65 miljoen vir reiskoste en meer as R740 000 vir akkommodasie beloop – teenoor die onderskeidelik meer as R3 miljoen en meer as R1,2 miljoen in die vorige boekjaar.
Die uitgawes in die kantoor van die adjunkminister, mnr. Andries Nel, was in dieselfde tydperk nagenoeg R730 000 (reiskoste) en R275 000 (akkommodasie), terwyl onderskeidelik nagenoeg R1,2 miljoen en R130 000 verlede jaar bestee is.
Reiskoste sluit sowel vlugte as huurmotors in, terwyl akkommodasie ook ontbyt en aandetes insluit, lui Radebe se antwoord op ’n vraag van die DA hieroor. Hy dui ook die uitgawes in die res van die departement soos volg aan:
- Direkteur-generaal: R55 000 (reis) en R25 000 (akkommodasie) teenoor 2008-’09 se R250 000 en R96 000;
- Regters: R1,6 miljoen (reis) en R1,5 miljoen (akkommodasie) teenoor 2008-’09 se R2 miljoen en R2,5 miljoen;
- Ander personeel: R29,5 miljoen (reis) en R66,9 miljoen (akkommodasie) teenoor 2008-’09 se R55 miljoen en R123 miljoen.
Radebe sê die uitgawes kan nie geskei word om aan te dui presies hoeveel op homself, sy adjunk en ander senior personeel bestee is nie “omdat daar gesamentlik oor die totale uitgawes verantwoording gedoen word ingevolge die BAS-finansiële stelsel wat deur die departement gebruik word”.
In weerwil van Radebe se antwoord het die departement van toerisme pas bekend gemaak dat die adjunkminister, me. Thokozile Xasa, tussen Mei en Augustus vanjaar nagenoeg R120 000 op hotel- en gastehuisverblyf bestee het terwyl haar amptelike woning opgeknap is. Soortgelyke inligting is deur ander departemente, soos dié oor mnr. Nathi Mthethwa, minister van polisie, se “presidensiële” hotelverblyf openbaar gemaak.
- Die Burger