Hofsaak hou Hestrie uit atletiek
2009-11-27 03:19
- Artikelopsies
- Deel
- Kry Die Burger op
Sarel van der Walt
Pretoria
Hestrie Els het dit oorweeg om weer aan atletiek te begin deelneem, maar die hofsaak waarby haar man betrokke is, tap te veel van haar energie.
Só het die voormalige hoogspring-wêreldkampioen (destyds Hestrie Cloete) gister in die Noord-Gautengse hooggeregshof hier gesê waar haar man, die sanger Jurie Els, teregstaan op aanklagte dat hy sy medesanger Robbie Klay gemolesteer het toe dié tussen 11 en 16 jaar oud was. Els ontken skuld.
“Ek het dit verlede jaar oorweeg om weer te begin oefen vir volgende jaar (2010) se Statebondspele (in Indië).
“Maar ek kan nie. Dié saak tap te veel van my energie. Dis nou al twee jaar en ek wens die hele ding is nou verby,” het sy gesê.
“Ek wou selfs in ’n stadium hê Coach (haar eertydse afrigter, mnr. Martin Marx) moet Nieu-Seeland toe kom om my weer af te rig.”
Sy, haar man en hul twee kinders woon die afgelope sowat twee jaar in Nieu-Seeland.
“Ek weet nie of ek nie dalk al te oud is nie.
“Ek is al 31 en die ma van twee kinders.
“Ek weet nie, dalk kom ek terug atletiek toe,” het die tweemalige Olimpiese silwermedaljewenner en tweemalige Statebondspele-kampioen gesê.
Haar stem is hees weens ’n verkoue. “Ek dink verlede week se koue het dit veroorsaak.”
Dié boorling van Coligny het die eerste twee weke van die verhoor by haar ouers in dié Noordwes-dorp deurgebring.
“Ons gaan nou tuis by ’n vriendin hier in Pretoria. Ek is nou hier om Jurie by te staan,” het sy gesê.
Terwyl haar man gister getuig het, het sy heel voor in die hof gesit en aandagtig na sy getuienis geluister.
- Die Burger