SA-vlugteling kap nou Kanadese

Johannesburg - Brandon Huntley, die gewese Kapenaar wat vroeër vanjaar vlugtelingstatus in Kanada gekry het, se prokureurs sê die Kanadese regering se aansoek om Huntley se vlugtelingstatus te hersien, is as gevolg van druk van Suid-Afrika en "misleidende beelde wat polities korrek is" , berig The Star Dinsdag.

Die Kanadese regering betwis ook die besluit om die 31-jarige Huntley vlugtelingstatus weens sy ras toe te ken.

Huntley se regspan het dié besluit afgemaak as 'n "misbruik van die proses" en 'n "aansoek wat polities misbruik is" en gegrond is op die bekommernis oor die aantal wit Suid-Afrikaners in die land woon.

Die Kanadese minister van immigrasie, Jason Kenney, wil hê die federale hof moet William Davis, die voorsitter van die tribunaal, se besluit om Huntley vlugtelingstatus toe te ken, hersien.

Dié tribunaal het vroeër vanjaar beslis dat Huntley ’n slagoffer van misdaad in Suid-Afrika was weens sy ras.

Huntley, wat in Mowbray in Kaapstad grootgeword het, het beweer dat hy reeds sewe keer deur swart mense in Suid-Afrika aangeval is en dat hy ‘n “wit hond” en “boer” genoem is.

Nie een van dié beweerde aanvalle is by die polisie aangemeld nie.

Sy regspan sê Kenney sou nie Davis se besluit betwis het as dit nie vir die "rasgedrewe druk" van die Suid-Afrikaanse regering was nie.

– Sapa