Manto se lewer ‘kan lank ná oorplanting verwerp word’

Cobus Coetzee

Johannesburg

Dit is nie ongewoon dat iemand se liggaam ’n nuwe lewer ná ’n oorplanting verwerp nie.

Só het prof. Del Kahn, hoof van Groote Schuur-hospitaal se oorplantingsafdeling, gister aan Die Burger bevestig nadat Rapport berig het dr. Manto Tshabalala-Msimang (69), vorige gesondheidsminister, is ernstig siek en sal waarskynlik ’n nuwe lewer moet ontvang.

Dr. Susan Tager, hoof van die Wits Donald Gordon- mediese sentrum in Johannesburg, het gister bevestig Tshabalala-Msimang is op 18 November vir toetse by dié sentrum opgeneem nadat sy “probleme met haar lewer” ondervind het. Tshabalala-Msimang het twee-en ’n half jaar gelede ’n leweroorplanting in Johannesburg ondergaan.

Volgens die orgaanskenkingstigting was sy een van 24 volwassenes wat in 2007 ’n leweroorplanting ontvang het. Die Sunday ­Times het daarna berig Tshabalala-Msimang se lewer is deur uitermate alkoholverbruik beskadig en dat sy ná haar oorplanting steeds gedrink het. Tshabalala-Msimang het dit ontken.

Volgens Khan kan ’n persoon se liggaam op twee maniere ’n nuwe lewer ná ’n oorplanting verwerp.

“In die eerste paar weke kan akute verwerping intree, maar die liggaam kan ook eers ná ’n paar maande of selfs langer die lewer verwerp,” het Khan gesê.

Die immuunstelsel se aanslag op ’n nuwe lewer kan deur medikasie soos Cyclosporine behandel word. Oorplantingspasiënte bly gewoonlik lewenslank op die medikasie.

Tshabalala-Msimang het die afgelope twee weke reeds ’n operasie ondergaan en dokters het aanvanklik bevind haar lewer word verwerp, het Rapport berig.

Dokters het ook reeds haar en haar familie oor ’n moontlike tweede oorplanting ingelig.

Tager het gesê Tshabalala-Msimang sal soos alle ander mense eers deur ’n paneel goedgekeur word voor ’n orgaanoorplanting sal plaasvind.

- Die Burger