‘Ek wens ek was meer wys’
2010-02-10 05:24
- Artikelopsies
- Deel
- Kry Die Burger op
Jeanne-Marié Versluis
Pretoria
’n Debat het gister in die Noord-Gautengse hooggeregshof hier gewoed oor of Cézanne Visser – in die volksmond bekend as adv. Barbie – berou het oor haar wandade met kinderhuismeisies en jong vroue.
Die verrigtinge vir Visser (32), ’n voormalige advokaat, se vonnis op 11 aanklagte is tans voor waarnemende regter Chris Eksteen aan die gang.
Dr. Eon Sonnekus, forensiese kriminoloog wat ’n voorvonnisverslag oor Visser opgestel het, het getuig hy het haar vraelyste laat invul.
“Interessante dinge het uitgekom, soos verwyt en spyt,” het hy getuig.
Adv. André Fourie, staatsaanklaer, het gesê ’n mens kan nie berou hê oor iets waarvoor ’n mens nie verantwoordelikheid aanvaar nie.
“Dis waar my probleem met me. Visser begin. Sy het nie verantwoordelikheid aanvaar nie.”
Fourie het gesê Visser gee voor dat sy self ’n slagoffer was van Dirk Prinsloo, haar gewese minnaar.
Sonnekus het getuig Visser se woorde dat sy jammer is vir haar aandeel aan die misdade, is ’n teken van berou. Fourie het geantwoord die hof het Visser as oneerlik bevind. “Sy het gelieg.”
Fourie het gesê Visser is jammer oor die “seer” wat haar ouers aangedoen is.
“Sy was Daddy’s little girl. Nou het sy hom teleur gestel. Daaroor is sy jammer.”
“Ek aanvaar nie dat daar nié opregte berou was nie,” het Sonnekus gesê.
Volgens hom het Visser se beste vriendin, me. Ronel Kirsten, op 19 Desember 2009 só op sy vraag van hom geantwoord:
“Sy (Visser) het werklik berou. Daar was by haar vorige werk mense wat vir haar gevas en gebid het. Sy het soveel meer wysheid.”
Sonnekus het getuig “berou is deel van wysheid, definitief”.
Volgens hom het Visser deurentyd gesê “dat sy jammer is oor wat gebeur het”.
Hy het haar gevra of sy haarself soms verwyt en, indien wel, waaroor.
Haar antwoord hierop was: “Ek wens ek was meer (wêreld-)wys op daardie stadium. En die pyn wat vir my familie en die slagoffers veroorsaak (word).”
Sonnekus het getuig binne die forensiese kriminologiese dissipline toon Visser se verwysing na die slagoffers se pyn “op insig in retrospek met betrekking tot die gebeure”.
Hy het getuig Visser het in Desember 2009 aan hom gesê: “Ek is nie meer vatbaar vir manlike manipulasie nie.
“As dit my eie kind was... is dit onaanvaarbaar. ’n Mens moenie toelaat dat iemand met jou kop smokkel nie.”
- Die Burger