Verkeer op Wes-Kaapse paaie ‘veel ligter’

Vania van der Heever

Kaapstad

Almal wat die Kersnaweek en die res van die feestyd die Wes-Kaapse paaie gebruik, het ’n verantwoordelikheid om hulself en ander padgebruikers veilig te hou.

Só het adv. Lennit Max, provinsiale minister van gemeenskapsveiligheid, gister in ’n verklaring gesê.

Hy het dié beroep gedoen nadat daar tussen 1 Desember en gister altesaam 44 mense in ongelukke op die provinsie se paaie gesterf het. In die ooreenstemmende tyd verlede jaar het 41 mense op die provinsie se paaie gesterf. Dit is heelwat minder as die sowat 140 padsterftes in dié tyd in 2007.

Mnr. Xenophone Wentzel, woordvoerder van die provinsiale verkeersdepartement, het gesê die provinsie se paaie is tot dusver glad nie besig nie. “Ons het vir baie meer verkeer voorberei.”

Op die R27 in die rigting van Kaapstad het gistermiddag vroeg 292 voertuie per uur gery. Altesaam 352 voertuie per uur het op die R27 uit Kaapstad gery.

Op die N1 het 204 voertuie per uur in die rigting van Kaapstad gery en terwyl 186 motors per uur uit die stad beweeg het.

Op die inkomende bane van die N2 het altesaam 880 motors per uur gery en op die uitgaande bane het 570 motors per uur gery.

“Die verkeersvloei is vanjaar ligter as verlede jaar. Die beamptes op voetsoolvlak het aan ons gerapporteer dat die paaie baie stiller is as wat ons verwag het,” het hy gesê.

Hy het gesê daar kan verskillende redes vir die ligte verkeer wees. Motoriste het dalk vroeër na hul vakansieplekke vertrek of hulle het besluit om vanjaar tuis te bly.

Die ander moontlike redes is die petrolprys en die resessie. Hy het gesê talle ongelukke kan vermy word as al padgebruikers versigtiger is.

Vandeesmaand is 11 bestuurders, 21 passasiers, 10 voetgangers en 2 fietsryers tot dusver op die provinsie se paaie dood.

- Die Burger