Verpligte pensioen opnuut in soeklig
2009-11-10 01:54
- Artikelopsies
- Deel
- Kry Die Burger op
Rajaa Azzakani
Kaapstad
Die hervorming van die land se maatskaplike sekuriteitstelsel is weer op die regering se agenda met ’n verpligte aftreefonds wat in werking kan tree.
Mnr. Geoff Doidge, minister van openbare werke, het gister op ’n inligtingsessie in die parlement gesê die regering is vasbeslote om ’n omvattende maatskaplike sekuriteitstelsel te skep wat gebou is op die beginsel van solidariteit.
“Die hervormingsbeginsel leen hom tot ’n stelsel wat verseker dat die meerderheid arm Suid-Afrikaners voordeel trek uit uitgebreide, nie-verpligte of maatskaplike ondersteuningsmaatreëls,” hetDoidge gesê.
“Die voorstelle maak voorbrand vir die instelling van ’n inklusiewe aftreefondsstelsel wat konsekwent is met internasionale tendense, en die meerderheid van Suid-Afrika se werkende bevolking kan beskerm teen werksverlies en afhanklikheid van inkomste tydens hul aftreejare.”
Mnr. Trevor Manuel, minister in die presidensie, het twee jaar gelede in sy termyn as minister van finansies só ’n plan aangekondig, maar daar het tot nou niks daarvan gekom nie.
Doidge het gesê die interdepartementele taakspan se gekonsolideerde regeringsdokument is reeds ingedien en dit sal waarskynlik op volgende week se kabinetsvergadering oorweeg word.
Dié dokument sluit voorstelle in oor die uitbreiding van die werkloosheidsversekeringsfonds, ’n nuwe padongeluk-versekeringstelsel en die nasionale gesondheidsversekering.
Mnr. Vusi Madonsela, direkteur-generaal in die departement van maatskaplike ontwikkeling, het bygevoeg “die land beweeg in die rigting van ’n verpligte pensioenskema”.
Hy het gesê die departement stel ’n verpligte skema voor, waarvan die raamwerk reeds in 2003 deur die kabinet goedgekeur is. Hulle werk net aan die besonderhede van die stelsel.
Die nuwe voorstelle maak voorsiening vir ’n groot aantal werkers om ’n bydrae te lewer tot ’n pensioenfonds.
Die voorstelle sluit in dat staats-ouderdomspensioen aan almal bo 60 toegeken word, ongeag hul inkomste. Mense wat tot die verpligte pensioenfonds bydra, sal by aftrede kwalifiseer vir voordele van sowel die staatspensioen as ’n addisionele bedrag uit die verpligte fonds.
“Mense moet aangemoedig word om te spaar. Baie mense, selfs dié wat werk, plaas nog hul hoop op die moontlikheid van ’n ouderdomstoelae (van die staat). Dit is glad nie genoeg om inkomste te vervang tydens aftrede nie.”
- Die Burger