Strate gesluit vir groot makietie
2009-11-30 00:58
- Artikelopsies
- Deel
- Kry Die Burger op
Aldi Schoeman
Kaapstad
Kaapstad het reeds begin om haarself uit te dos vir die groot sokkerpartytjie waarvan dié stad Vrydagaand gasheer is.
Die voorbereidings het egter tot gevolg dat verskeie strate rondom die Kaapstadse Internasionale Konferensiesentrum (Kiks), waar die finale loting vir die 2010 Wêreldbeker-sokkertoernooi plaasvind, en Langstraat, waarheen die loting regstreeks uitgesaai gaan word, hierdie week gesluit is.
In Langstraat moet onder meer ’n verhoog en groot televisieskerm aan die kant naaste aan Tuine opgestel word.
Langstraat tussen Buitensingel en Buitenstraat, en Buitenstraat tussen Langstraat en Loopstraat in ’n oostelike rigting is van vanmiddag 13:00 tot volgende Maandag omstreeks 05:00 gesluit.
Die res van Buitenstraat word ook van Vrydag tot Maandag gesluit.
Van Vrydag 01:00 tot Saterdag 12:00 word die volgende strate ook gesluit: Langstraat tussen Buitenstraat en Dorpstraat; Bloemstraat tussen Koningin Victoria- en Loopstraat; Pepperstraat tussen Lang- en Loopstraat; Leeuwenstraat tussen Keerom- en Loopstraat; Vredenburglaan; Loopstraat tussen Buitensingel en Bloemstraat; Greenstraat tussen Koningin Victoria- en Langstraat; asook Dorpstraat tussen Keerom- en Loopstraat.
Langstraat van Dorp- tot Waalstraat word van Vrydag 18:00 tot Saterdag 12:00 gesluit en Langstraat tussen Buiten- en Greenstraat Saterdag van 12:00 tot 18:00.
Voor die Kiks moet onder meer ’n rooi tapyt uitgerol word om staatshoofde van oor die wêreld heen te verwelkom en mediageriewe moet opgestel word.
Hiervoor is een ooswaartse baan van Coen Steytlerlaan tussen Laer-Langstraat en Heerengracht van vanoggend 09:00 tot volgende Maandag omstreeks 05:00 gesluit. Van môre 09:00 is al die ooswaartse bane gesluit.
Die hele Coen Steytlerlaan is van Vrydag 11:00 gesluit.
Die linkerbaan van Laer-Langstraat tussen Coen Steytlerlaan en Cullinanstraat is van vandag tot Donderdag daagliks tussen 09:00 en 15:00 gesluit.
Die suidwaartse baan van Laer-Langstraat tussen Kiks-ingang 2 en Coen Steytlerlaan is van Woensdag 10:00 tot Vrydag 05:00 gesluit, waarna al die bane van Laer-Langstraat tussen Tafelbaai Boulevard-verlenging en Coen Steytlerlaan tot Saterdag 05:00 gesluit gaan wees. Laer-Langstraat tussen Coen Steytlerlaan en Cullinanstraat is van Vrydag 11:00 tot Saterdag 05:00 gesluit, die Tafelbaai Boulevard-verlenging tussen Heerengracht en Oostelike Boulevard is Vrydag van 05:00 tot Saterdag 05:00 gesluit en Cullinanstraat is van Vrydag 11:00 tot Saterdag 05:00 gesluit.
- Sakeondernemings in die middestad van Kaapstad kan voortgaan met sakebedrywighede wat nie in stryd is met die munisipale verordening teen guerrilla-bemarking nie.
- Die Burger