Skaapkoppe vlieg toe soos soetkoek op fees
2010-08-31 08:40
- Artikelopsies
- Deel
- Kry Die Burger op
Vrydagaand was dit soesji in die stad en Saterdag die langpad na Calvinia om ’n gebraaide skaapkop by die Vleisfees te gaan soek, skryf Eben Human.
Die lewe is ’n kulinêre reis. Só voel dit regtig party dae.
As jy ’n stadsbewoner is, kan jy binne loopafstand wees van restaurante waar jy eksotiese geregte van lande soos China, Thailand, Viëtnam, Italië of Japan kan geniet.
Dan is daar dae wat jy net lus is vir ’n lekker ou skaaptjoppie.
As jy nie self wil braai nie, en jou vleislus regtig groot raak, vat jy die pad na Calvinia waar die mense die afgelope naweek vir die 21ste jaar hul Vleisfees gehou het.
Mouton van Zyl se Moto-Avontuur het dié slag ondersteuning van meer as sestig motorfiets-entoesiaste gekry.
Die Caledonners is al Vrydag deur na die fees en ’n paar van ons ry toe Saterdagoggend vroeg saam in ’n bussie om die res te volg.
Net anderkant Ceres vat ons die grondpad en hou eers stil – langs ’n dooie bakoorjakkalsie.
Dit het my belangstelling in hierdie soort ongevalle geprikkel en ek tel die naweek drie bakoorjakkalse, drie hase en die groot verrassing – die oorblyfsels van ’n rooijakkals.
Deur die Tankwa-Karoo ry jy sulke lang reguit paaie. Die wêreld lyk droog en klipperig.
Nader aan Calvinia begin dit meer na goeie skaapwêreld lyk en dan is jy by die feesterrein.
Hulle het oor die twee dae weer hul gebruiklike 6?000 besoekers gekry en daar is lekker gekuier en rugby gekyk op ’n grootskerm.
My probleem was dat kollega Theuns van der Westhuizen gevra het ek moet vir hom ’n gebraaide skaapkop saambring.
As Namakwalander van Nuwerus se wêreld is sy vleistande nog lank nie stomp nie en hy wou bitter graag saam met die bussie gereis het.
Ander verpligtinge het hom weerhou en dit was my taak om ’n skaapkop te kry.
Saterdagmiddag om twaalfuur was egter te laat, moes ek hoor by Hannes Visser se stalletjie.
Hulle het 64 koppe gehad – maar dit het soos soetkoek verkoop.
By die twee stalletjies langs hom was minstens nog 50 skaapkoppe – ook alles opgeraap deur die vleiseters.
Visser was die vorige vier jaar die hooforganiseerder van die fees en dit is toe by hom wat ek meer wil weet hoe dinge hier in die Hantamwyk werk.
“Hier bedien ons vandag alles van die skaap se snoet tot die punt van sy stertjie en ook alles tussenin,” vertel hy.
Daar is afval, sosaties, nek, lewer-in-netvet, kaiings, stertjies, pofadders, die hele lot. Wat ek egter gemis het, was die bykosse, slaai en servette.
“Ons het voorheen slaai bedien, maar dit het nie groot aftrek gekry nie. Dit is nie die moeite werd vir ons om slaai te maak nie,” was die Hantammer se verduideliking.
Daar was roosterbrood, slaptjips en tamatiesous. Die worsie met slaptjips en tamatiesous wat ek toe verkies het, was lekker warm en smaaklik.
Die Italianer Antonio Saetta het met ’n gehuurde motorfiets saamgery.
Hy kom oorspronklik van Napels en kon nie uitgepraat raak oor die agterpaaie nie en die baie vleis wat in Calvinia deur die feesgangers verorber is.
Dit was nie asof ons gashere nie bereid was om groot moeite te doen nie. Van die skape is reeds Vrydag op die hoef beoordeel.
Die aand word hulle geslag en Saterdag kan jy hul karkasse op die Vleisfees aan die haak sien.
Dan word die vleis beoordeel en word pryse uitgedeel.
Dit was weer lekker om saam met Moto-Avontuur se manne te reis.
Daar is oornag in ’n plaaslike skoolkoshuis voordat die 80 km grondpad die Sondagoggend na Loeriesfontein gevat is.
Langs die pad was mooi kokerbome en ons het ’n draai by die Windpomp-museum gemaak voordat ons by Nieuwoudtville se waterval gestop het.
By die waterval was ’n stalletjie waar daar gebraai is en die vroue pannekoek en konfyt verkoop het.
Van Nieuwoudtville het ons weer grondpad gery oor die Botterkloofpas na die Sederberge.
Pakhuispas is nou geteer en nie meer dieselfde nie.
Die Vleisfees was lekker en daar was ’n paar kampies waar stoetdiere, ook pronkerige boerbokramme, te sien was.
Maar toe wonder ek mos na die naweek: “Hoe moes ’n ou boerbokram gevoel het op die Vleisfees in Calvinia?”
Malinda Croukamp op pad na die Vleisfees op Calvinia. Daar is van Ceres deur die Tankwa-Karoo op die agterpaaie gery.
Cobus Hough besig om sy kliprib te braai.Foto: Albi Fouché
Stadsjapies wat die naweek op Calvinia uitgehang het. Van links is Mannila Postma, Jana Kritzinger, Louise Joubert, Laurian Botha en Anina Bezuidenhoud.
Antonio Saetta van Italië ry verby ’n padongeval. Vir hom was die naweek ’n kultuurskok.