Teen die einde van Februarie kry jy nog van die warmste somerdae in
die Karoo en dit was op so ’n Sondag wat ek en my vrou, Lucille, aanmeld op die
Kaapse stasie.
Ons het al baie gehoor van die spoggerige vakansieplaas Melton Wold
naby Victoria-Wes, en ook dat jy met die trein daarheen kon reis.
Melton Wold is 630?km van die Kaap en 800?km van Johannesburg.
Die retoer-treinkaartjie na Hutchinson kos R320 per persoon van
Kaapstad en R440 van Johannesburg.
Dit sou die ideale wegbreekkans vir my vrou wees ná ’n stresvolle
tyd by die werk. Tóg het ’n mens gewonder oor veiligheid en of jy ’n aangename
ervaring sou hê.
Die trein sou om 12:30 vertrek. Dié tyd stoot ’n paar jongmanne
laggend die sleepwaens met die beddegoed nader. Hulle lyk soos studente sonder
sorge – soos in die dae toe ek self ’n kelner was.
In daardie dae moes ons met vertrektyd as kelners stiptelik
aangetree in die eetsalon staan – ’n tyd wat almal gerespekteer het.
Die Shosholoza Meyl vertrek uiteindelik 23 minute laat rustig uit
Kaapstad, terwyl ons opgewonde die ander kant van die N1 op pad na Bellville
bekyk.
Bellville is die eerste stilhouplek. Eers hierna kan ons na die
eetsalon gaan.
Ons vra die veiligheidswag om ons koepee te sluit. Net die
treinbestuurder dra egter ’n sleutel, maar daar word flink aan ons versoek
voldoen.
Ons koepee is effens beknop en ons vra of daar nie dalk ’n
kompartement beskikbaar is nie.
“Die trein is vol. Daar klim 172 passasiers by Worcester op,” kom
die antwoord.
Die eetsalon se groot vensters laat jou dadelik ontspanne voel en
ons bestel ’n koue bottel witwyn.
Ons kry een van Nederburg se staatmakers teen R55 en die
kerrie-en-rys lyk ook heel lekker teen R30.
Die spyskaart is beperk, maar met die duurste gereg teen R50 is dit
bekostigbaar.
Daar is ook kelners wat wegneemetes flink na die kompartemente
dra.
Die groot groep wat daarna op die Meyl toesak, is mense wat ’n
kerkkonferensie op Worcester bygewoon het. Hulle is op pad terug na Gauteng en
die Vrystaat.
Die voertaal op die trein is daarna Afrikaans en die meeste van ons
nuwe passasiers – mans, vroue en kinders – verkies om kaalvoet die hitte te
trotseer.
Die man wat egter die benoudste op die trein was, was die
sjef.
Daardie aand sou hy en die kelners bontstaan terwyl die ysvoorraad
vinnig begin smelt en koue drankies ’n luukse word.
Eers teen halftien kry ons ’n sitkans. Sommige van die laaste
passasiers is teen dié tyd net moeilik.
“Op pad na Worcester was die diens uitstekend. Wat gaan vanaand met
julle aan?” wou van hulle net luidkeels weet.
Om tienuur strompel daar ’n lang kêrel wat soos die Jamaikaanse
naelloper Usain Bolt lyk uit die warm treinkombuis.
Dis die sjef.
“Jammer, mense. Ons moes vanaand meer as 400passasiers bedien.
Ons het ons bes probeer,” sê die moedige sjef.
Ek wou graag vir die man hande klap vir sy goeie maniere, maar van
die passasiers looi hom steeds.
Die trein was byna ’n uur laat toe ons by ’n verlate Hutchinson
afklim. Jan Kleinbooi van Victoria-Wes moes ons kom haal met sy taxi, maar van
hom is daar geen teken nie.
Ons bel Kleinbooi op sy selfoon en hoor hy is op pad. Kort daarna
sien ons ligte, maar dit is ’n Golfie waaruit laat passasiers peul.
Met die trein weg, staan daar net ’n verlate Golfie. Ek stap later
in die helder maanlig oor die treinbrug en hoor ’n stem: “Kom iemand julle
haal?” Dis die Golfie se bestuurder.. Hy en sy maat was seker bekommerd oor ons
veiligheid.
Kleinbooi daag kort daarna in sy minibus op en ons vertrek haastig
na Melton Wold. Die rit kos ons R200.
“Ek wil nie te vinnig ry nie. Hier is deesdae heelwat koedoes en
ons het al ’n paar lelike ongelukke gehad,” sê hy heel gerusstellend.
Teen halfdrie die oggend is ons in die bed en kon daarna uitsien na
drie wonderlike dae op die plaas.
Ons is die Woensdagaand terug na Hutchinson om kort ná middernag
weer die trein te haal.
Johann van der Walt, ’n boer van Hartswater, ry vir die eerste keer
op die Shosholoza Meyl saam en hy en sy vrou, Tienie, sê hulle vind dit heel
aangenaam. Net jammer hy het so laat in Kimberley aangekom, sê hy.
Die Puk-student Michelle Coad sê sy het die laaste jare ook gereeld
tussen Potchefstroom en haar ouerhuis op Worcester gery.
Die algemeenste klagte is dat die treine nie volgens hul tydrooster
ry nie, en Michelle voeg by: “Ek geniet die treinritte. Hulle het die trein
altyd baie skoon gehou. Dit lyk nie of hulle dit deesdae meer so pligsgetrou
doen nie.”
Maar gaan ry ’n slag self. “Volgende keer pak ons soos in die ou
dae ’n kosmandjie en neem koue verversings saam,” sê my vrou.
Daar is ook hoop vir ’n beter diens. Verlede week het mnr. S’bu
Ndebele, minister van vervoer, in die parlement gesê die Passasierspooragentskap
van Suid-Afrika (Prasa) het sedert Januarie 2006 meer as R118 miljoen aan 128
konsultante bestee.
Sjoe - hoveel gaan dit nog kos om 'n trein betyds by sy bestemming te kry?
Ken jy die Shosholoza?
Die mynwerkers het “Shosholoza” gesing. Baie van hulle moes van ver
met die trein na die goudmyne aan die Rand reis.
Die treine het hulle Imeyli genoem, wat uiteindelik tot die naam
Shosholoza Meyl gelei het.
Besoek die webtuiste www.shosholozameyl.co.za vir meer inligting.
Die volledige tydroosters verskyn daar en jy kan aanlyn bespreek.
Ons het toeristeklas gery en ons bespreking op die Kaapse stasie
gaan doen.
Daar is ’n nog goedkoper ekonomiese klas met net regop sitplekke,
asook ’n luukser premierklas.
Teoreties moes ons trein om 12:30 uit Kaapstad vertrek en om 23:55
in Hutchinson aankom.
Die trein se bestemde tyd van aankoms die volgende dag in
Johannesburg was 15:18.
Uit Johannesburg kan jy weer byvoorbeeld om 10:30 op ’n Woensdag
vertrek.
Jou aankomstyd is veronderstel om 01:15 Donderdagoggend op
Hutchinson te wees en 12:40 die middag in Kaapstad.
’n Retoerkaartjie tussen Kaapstad en Johannesburg kos R860.
Jy betaal R40 ekstra vir skoon beddegoed. Daar is ook
gemeenskaplike stort- en toiletgeriewe.
Vir algemene navrae en besprekings kan
jy 0860008888 of 0117744555
bel.
Vir ’n besoek aan Melton Wold kan jy
Ronél Vorster bel by 0536211912 vir navrae.
Bel
die betroubare Jan Kleinbooi by 0733866215 of 0536210189 om vir jou
’n taxi van Hutchinson na Melton Wold en terug te reël