Maak maats met die pyn in jou kuite

• Artikelopsies
  • Druk artikel
  • e-pos artikel
• Deel
  • Yahoo
  • Google
  • Digg
  • del.icio.us
  • Facebook
  • Twitter
• Kry Die Burger op
  • Jou selfoon
  • Jou Facebook-profiel

Ruan du Toit lei die ryers op die pragtige roete van die Contego Rock Pedal Classic in die omgewing van George in die Suid-Kaap.

Foto's   ·   Lesersfoto’s   ·   Nuus in Foto's Stuur vir ons jou foto's  ·  Stuur vir ons jou foto's

George en omgewing is bekend vir buitelugaksie. Veldlopers, bergfietsryers, ystermanne en -vroue, naellopers en langasems van oor die hele wêreld heen kom kuier (of bly) hier om baat te vind by die uitstekende sport-infrastruktuur en sonskynweer wat die Eden-munisipaliteit bied.

Dis juis een van die redes waarom Jan Heenop van 24-7 Adventures jaarliks die Contego Rock Pedal Classic-bergfietswedren hier aanbied.

Dié trap rondom Cradockpiek is waaragtig 100% avontuur, en dis nie ’n fietsren wat jy wil aanpak voordat jou agterstewe goed bevriend geraak het met die fiets se sitplek nie.

Die RPC skop af by die Saasveld-kampus van die Nelson Mandela Metropolitaanse Universiteit en die eerste 20 km of so is heel rustig, al met die enkelspoor deur die plantasies en woude hier teen die Outeniekwaberge se hange.

Spaar jou asem, want ’n moordende klim wag op jou al met Montagu-pas langs.

Byt vas en maak maats met die pyn in jou kuite tot jy bokant die dorpie Herold uit-top en trap vir ’n vale al met die vlaktes van die Klein-Karoo langs tot by die wynlandgoed Louvain.

Die jaers ry van George in die rigting van Herold en terug. Hou maar ook die pad dop vir skilpaaie. Foto’s: Jacques Marais

Hier kan jy ’n lafenissie geniet voordat die moordende Voortrekkerpas jou in die gesig staar.

Wanneer jy by Hoekwil verbysuiker, weet jy die Contego Rock Pedal Classic se rug is gebreek. Al wat oorbly, is die finale klim terug tot by Saasveld en dan kan jy lekker smul aan ’n burger en skyfies (Spur is nogal een van die borge, dus hoef jy nie eens jou beursie uit te haal nie).

Hoewel voorste fietsryers soos Erik Kleinhans (wenner by Wines2Whales verlede jaar) en Dan Hugo (Xterra-kampioen) gesig kom wys het, was dit Ruan du Toit wat uiteindelik met die louere weggestap het, met Jaco Venter en Nico Fitzenmoie kort op sy hakke. Onder die vroue was Ariane Kleinhans net te goed vir haar teenstanders en dit was net Ischen Stopforth wat naby haar kon bly.

Die visie vir die Rock Pedal Classic is dat dit ’n bergfietsren sal word wat sowel top-ryers as naweek-stryders sal lok.

Indien die trapgogga jou dus gebyt het, wag daar goed vyf uur se trap op jou al met Eden se grondpaaie, passe en viertrekroetes langs.

Al die inligting wat jy mag benodig, is by www.24-7adventures.com. Gaan loer gerus!

• Kontak Jacques per e-pos by jacques@jacquesmarais.co.za of bel hom by 083 444 5369 met enige opwindende avontuurgebeurtenisse of buitelugnuus.
  

Die jaers ry van George in die rigting van Herold en terug. Hou maar ook die pad dop vir skilpaaie.
Foto’s: Jacques Marais