Kromrivier se hut ideaal vir kleintjies
2012-01-17 00:00
- Artikelopsies
- Deel
- Kry Die Burger op
Die Stellenbosch-afdeling van die Bergklub van Suid-Afrika (BKSA) het vroeër vandeesmaand ’n baie suksesvolle uitstappie na die Kromrivierhut gehad.
Ons was op soek na nuwejaarsblomme of nuwejaarslelies. Daar is besluit om dit ’n langnaweek te maak, aangesien dit die laaste naweek van die skoolvakansie was.
Die nuwejaarsblomme blom baie vroeg in die jaar en jou tydsberekening moet reg wees om hulle te vind.
Die Engelse naam van die blom, waterfall gladiolus, is ook ’n goeie beskrywing, aangesien hierdie blomme slegs groei by watervalle of op nat hange wat noord front.
Een van die mooiste beskrywings van hierdie nuwejaarsblomme kom van die Amerikaanse webblad www.strangewonderfulthings.com, wat dit beskryf as een van die wêreld se mooiste gladiolusse.
“Die inheemse Suid-Afrikaanse blom skree vir aandag. Dit is pure plesier wanneer hulle in blom is,” word hy op die Amerikaanse webtuiste besing.
Die Kromrivierhut, wat aan die Paarl-Wellington-afdeling van die BKSA behoort, is seker een van die toeganglikste bergklubhutte naas die Du Toitskloofhut.
Die 2.5 km-staptog na die hut is ideaal vir klein kinders, veral met die heerlike swempoel sowat 100 m vanaf die hut.
Vir die ervare bergklimmer of stapper is die hut ook die ideale basis van waar Kromrivierpiek, die Kromrivier Dome, Witteberg en vele ander plekke verken kan word (natuurlik met ’n geldige CapeNature-permit).
Dis ook die ideale oorslaapplek op pad na Springtygbeugel, nog ’n eiendom van die BKSA, of die Slanghoekafgrond.
My ander gunsteling-BKSA-hutte is die Agter-Tafelberghut en Thomashut bo-op Fonteintjiesberg, wat aan die Worcester-afdeling behoort.
Ongelukkig het die Stellenbossers se hut in die Banhoekvallei ongeveer tien jaar gelede heeltemal afgebrand.
Weens aanhoudende vandalisme is daar toe maar besluit om die hut nie te herbou nie. Dit beteken dat ons Stellenbossers nou maar op die goedgunstigheid van die ander afdelings moet staatmaak vir ’n lekker hut-uitstappie.
Die kinders het die laaste naweek van hul vakansie by die Kromrivierhut terdeë geniet en die swempoele sowel as die “sitvlakgly” was vet pret. Vir die “ouer” mense was dit nie net die swempoele nie, maar ook die pragtige fynbos wat betower het.
Ondanks die snikhete naweek was die veld rondom die Kromrivier Dome nog blommeparadys.
Daar was selfs nog ’n paar rooi-pienk en die roomkleurige koninginprotea (Protea magnifica) wat teen die hange geblom het.
Dit was ook interessant om die rooi disa (Disa uniflora) so vroeg te sien blom. Op Tafelberg blom hulle eers laat Februarie.
- Peter Jan Randewijk is ’n vryskut-skrywer van Stellenbosch.