Kampeer in landelike Swellendam

Daar is gesoute kampeerders wat reken Swellendam se munisipale woonwapark is een van die mooistes in die land.

Hier kamp jy in die skadu van lowergroen akker-, geelhout-, wilger- en kanferbome, met die Langeberg wat oor jou troon en die Koringlandsrivier aan die een flank.

Met Swellendam halfpad tussen Kaapstad en George geleë, is dit ’n gewilde oornagplek. Buitelandse toergroepe in huiswaens en sportgroepe word gereeld opgemerk.

Tydens die Coronation Double Century-fietswedren, wat jaarliks einde November aangebied word en al geruime tyd in Swellendam begin en eindig, is die plek tjokkenblok.

Die woonwapark is aan die rugkant van die historiese dorp geleë, wat vir ’n eg landelike atmosfeer sorg.

Goeie nuus is dat die munisipaliteit begin het om dit op te knap. Die riet-oordak by die ingang is reeds vervang en daar is ook begin met herstelwerk aan die rietdakke van die selfsorg-kothuisies.

Ander onooglikhede – soos vervalle braaiplekke, stukkende deurknoppe, verf wat afskilfer en ’n wasmasjien wat al geruime tyd buite werking is – sal hopelik deur die loop van vanjaar aandag begin kry.

Volgens dr. William Clayton, hoof van gemeenskapsdienste by die plaaslike munisipaliteit, kyk die nuwe raad tans na ontwikkelings- en opknappingsvoorstelle vir die terrein. Die werk kan dalk uitgekontrakteer word of die munisipaliteit kan dit in vennootskap met ’n diensverskaffer aanpak.

’n Aansuiweringsbegroting sal ook binnekort ter tafel gelê word, wat beteken dat instandhouding van die woonwapark sy gang sal kan gaan.

Hoewel die vier sentraal geleë ablusieblokke deurgaans skoon gehou word, kan veral die twee manskante baat vind by die beoogde opknapwerk. Nog ’n tameletjie is dat die staanplekke vroeër genommer en afgemerk was, maar dat dit met die jare verweer het. In die opknappingsproses sal ook hieraan aandag gegee word, sê Clayton.

Hy is voorts bewus van ’n gevoel onder sommige kampeerders dat hierdie ’n lawaaierige kampeerterrein is. ’n Geraasbeleid bestaan wel, benadruk hy, en noem dat mense wat in die kothuisies tuisgegaan het, onlangs by twee geleenthede daarop gewys is dat hulle weens hul rumoerige gedrag nie weer op die kampeerterrein toegelaat sal word nie.

In die hele Desember is daar net een klagte ontvang, en hy kan net enkele kere onthou wat daar probleme was met mense wat by kampeerders of in die huisies besoek afgelê het.

Die beleid is dat dagbesoekers net tot 20:00 toegelaat word en dat ander besoekers teen 22:00 uit die kamp moet wees. Dagbesoekers – en kerk- en skoolgroepe – gebruik ’n groot grasperk met braaigeriewe in die een hoek van die terrein.

Daar is altesaam 100 grasbedekte kampeerplekke op die terrein, waarvan 67 krag het. Die staanplekke is effe knap, met maksimum vier mense wat toegelaat word. Is die groep groter, moet vir ’n ekstra staanplek betaal word.

Vier staanplekke deel ’n kragpunt, terwyl braaiplekke, waterpunte, vullisdromme en sementtafeltjies met drie sitplekke deur die kamp versprei is. Net een voertuig word per staanplek toegelaat, hoewel uitsonderings tydens groot geleenthede soos die Double Century gemaak word.

Die 20 kothuisies het elk slaapplek vir vier mense en kan met of sonder beddegoed gehuur word (nuwe linne is ’n jaar gelede aangekoop). Elk het sy eie braaiplek.
Twee van die kothuisies word tans tydelik beset deur gesinne wie se huise in die buurt Rondomskrik in die slag gebly het toe ’n brandweerwa teen ’n afdraande op loop gegaan het.

• Jackie Pienaar-Brink is ’n vryskutskrywer van Durbanville.

- Die Burger