Die ooievaar hou jou dop
2012-01-24 14:48
Rykie Swart het haar kampreëls wat sy toepas, maar sy gee nie om as jy jou perd en hond na Khomeesdrif wil saambring nie.
Daar is ’n verskeidenheid voëls in hierdie omgewing, en jy kan ook in die somermaande verwag dat witooievaars hier hoog bo jou tent gaan draai.
Hopelik is jy nie só bygelowig dat dit jou gaan afskrik om ’n slag op Khomeesdrif te gaan afpak nie. Vir stedelinge is dit wonderlik om te weet daar is so ’n uitspanplek om die draai. Van die Moederstad se kant ry jy op die N2 by Botrivier en Caledon verby na die volgende dorp – Riviersonderend. Hier kan jy nog vinnig iets aanskaf wat jy dalk tuis vergeet het.
Dan ry jy 2 km terug in die rigting van Kaapstad en draai regs af na die Sonderendrivier met die nuwe kampeerterrein op sy walle.
Net 5 km grondpad en jy is by die kampeerplek.
Daar is nie elektrisiteit en kragpunte nie, en die ablusiegeriewe is ’n bietjie beperk. Alles is egter baie skoon en sindelik.
Dan was ’n mens ook baie dankbaar vir die skaduwee en gras in ’n naweek dat die son baie warm was.
Bootjies en kano’s is daar tot jou beskikking. Vat maar die spane en gaan roei op die rivier. Dit is gratis.
Rykie se man, Cansius, vul sy boerderywerk aan met houtwerk. Hy vervaardig ook doodskiste om die pot aan die kook te hou. Hierdie boer verskaf graag vleis aan sy kampeerders. As jy dalk die vleis tuis vergeet het, is dit geen krisis nie.
Om die kampeerterrein is dit oop en gelyk. Perde, honde en kinders het hier genoeg ruimte om sorgeloos te kan hardloop en spring.
Op warm somerdae boer almal egter in die rivier. Hier is lekker swempoele en karp, barbers en swartbaars wag vir dié wat hul visstokke saamgebring het.
Die walle oorkant die rivier is baie bosryk, en daar was verbasend baie paradysvlieëvangers en hoephoepe in die omgewing. Ander voëls wat die naweek opgemerk is, is die kuifkopvisvanger, Kaapse kanarie, geelvink, koningrooibekkie, geelbekwou, mikstertbyvanger en hadida.
In die ruigtes kon jy die vleiloerie hoor, en in die nag was daar uile, maar dit was ’n jakkals wat die stadshonde blykbaar benoud gemaak het.
Die honde het in ’n koor geprotesteer. Hulle was gou weer stil, en jy het geweet dat hierdie kampeerterrein ’n baie veilige plek is.
Vroegoggend het ons dorp toe geglip om ’n Sondagkoerant en vrugtesap te gaan koop.
Op pad terug het ons eers drie ruiters van een van die buurplase gekry. Ian Kingwill het toe kom groet terwyl foto’s geneem is. Hy is oor sy melkboerdery uitgevra en het my toe van hul kaasfabriek vertel.
Sondag het ons saam met ’n klompie mede-kampeerders ’n groot kring gemaak. In ons kring was my ou hardloopvriend Sybrand Mostert, Heinrich en Esther Eybers van Riviersonderend, asook Andrew en Sam Travers van Melkbosstrand. Die polisieman Koos-Yster Pieters was op sy stukke as baasstorieverteller. Potjiekos en potbrood van die boonste rak is opgetower. Op ’n warm dag is dit nie lekker om jou tentpenne op te trek nie.
Dit was hierna maar weer swaar om die Sonderendrivier se walle te verlaat en die besige N2 aan te durf na die betonoerwoud.
BESPREEK HIER
Tente en woonwaens word toegelaat. Daar is ‘n maksimum
van 30 staanplekke.
Bring jou bergfiets saam. Daar is 27 km grondpad wat jy na
Greyton kan
ry.
Die plaasmark wat Saterdagoggende op Greyton aangebied
word, is baie gewild.
Jou staanplek kos R200 per dag en dit dek die koste van
vier besoekers. Dit kos R50 vir elke ekstra persoon en ‘n maksimum van ses per
staanplek word toegelaat.
Die ablusiegeriewe sluit vier badkamers met
warmwaterstorte en spoeltoilette in. Daar is ook ’n
waskamer.
As jy ’n hond of perd wil saambring, moet dit vooraf met
die eienaars bespreek word. Dit is beter om stiller tye hiervoor te kies wanneer
jy en jou beste vriend op jul gelukkigste sal wees.
Die perde kan in kampe op die plaas gehuisves word waar
daar ook voerkrippe is. Voer word nie aan die perde voorsien
nie.
Kontakbesonderhede: Bel
Rykie Swart om jou kampeerplek te bespreek by 0 028 261 1995 of
0082 937 0053; faks: 086 508 7424; e-pos:
bookings@khomeesdrif.co.za;
www.khomeesdrif.co.za.
) Besoekers aan Khomeesdrif
kan ook op ’n
buurplaas kaas gaan proe.
Desirée Kingwill sê hul kase word van Jerseymelk gemaak
en hulle gebruik geen preserveermiddels of kleursel nie. Die rennet wat in die
kase gebruik word, is plantaardig.
Slegs kruie/speserye word gebruik vir geursels, soos bv
brandnetel, peper, mosterd en komyn. Die Kingwills se grootste afsetpunt is elke
Saterdagoggend by Greyton se mark.
Gaan maak ’n draai by die Kingwills as jy van hul kaas
wil proe. Bel 0 028 261 1809 of 082 890 7156 om ’n afspraak te
reël.